akhabaron par bharosa barakarar

umesh chaturwedi
amerika aur yoorop men jaise-jaise intaranet ka prasar badhata ja raha hai, akhabaron ke prasar men girawat dekhi ja rahi hai. isake chalate wahan akhabaron ke astitw par hi sawal uthane laga hai. char sal pahale briten ki patrika d ikonanmist men prakashit kawar stori- hu kild d nyoojapepar – ke bad ye sawal jabardast tarike se uchhala. aisi halat men praisawatar hausakoopar ki taja riport akhabari duniya ko rahat de sakati hai. warld esosiyeshan ऑf nyooj pepars ki pahal par praisawatar hausakoopar ne hal hi men amerika aur briten ke 4900 pathakon, tis bade midiya gharane aur das badi wijnyapanadata kanpaniyon se sarwe ke bad ek riport jari ki hai. is riport se saf huaa hai ki bhale hi pashchimi duniya men akhabaron ki bajay intaranet ko jyada tarajih di jane lagi hai. lekin ab bhi jyadatar logon ko print par hi bharosa hai. jabaki sirf basath fisadi log hi paise dekar intaranet par upalabdh ya akhabaron ke dijital sanskaranon ko padhane ke liye taiyar hain. pashchimi akhabari jagat ke liye ye riport jahan chaunkane wali hai, wahin intaranet ke prati akhabari sansthanon ke badhate bharose ko santulit karane ke liye bhi kafi hai. akhabari prasar men girawat ke bad midiya mugal roopart mardok ke prakashanon samet d taims nyooyark jaise prakashan bhi apane intaranet sanskaranon ki pathakon ke bich muft pahunch ko simit karane ke liye jaroori sanftaweyar ke wikas men jut gaye hain. taki in prakashanon ke intaranet sanskaranon tak unhin pathakon ki pahunch ho, jo isake liye kimat chukane ko taiyar hon. lekin praisawatar hausakoopar ki is risarch riport se saf hai ki wikasit duniya ke pathakon men intaranet ke prati waisa bharosa nahin hai, jaisa ki print ke prati hai. kyonki print ke liye ab bhi shat-pratishat log kimat chukane ke liye taiyar hain.
paranpara ki poonji ke chalate chahe poorab ka samaj ho ya pashchim ka, print badi takat bana huaa hai. yahi wajah hai ki pathakon ka usamen bharosa bana huaa hai. yahi wajah hai ki wijnyapanadataon ka bhi un par bharosa barakarar hai. isaki tasdik praisawatar haus koopar ki risarch riport bhi karati hai. riport ke mutabik dijital madhyamon ki or wijnyapan ka prawah badh raha hai. lekin wijnyapanadata ganbhir aur bharosemand pathakon ko lubhane ke liye akhabaron par hi jyada bharosa jata rahe hain. isamen un akhabaron ki sanbhawana jyada behatar najar aa rahi hai, jinhonne apane dijital ya intaranet ya fir donon tarah ke sanskaran shuru kar rakhe hain. yani un akhabaron par wijnyapanadataon ka bharosa bana huaa hai, jo badalate daur men naee takanik ko aatmasat karane men pichhe nahin hain. halanki is riport men ye afasos bhi jataya gaya hai ki yah chalan abhi jyadatar akhabar samoohon men shuru nahin ho paya hai. baharahal riport ne ummid jataee hai ki bajar men apana astitw bachaye rakhane ke liye der-saber sabhi prakashanon ko apane dijital ya intaranet sanskaranon ko behatar banana hi padega.
waise waishwik mandi aur aarthik sankat ke chalate ye bhi sach hai ki akhabaron ki rah kathin huee hai. praisawatar haus koopar ki is riport men bhi anuman lagaya gaya hai ki samachar patron ke global bajar men is sal 10.2 pratishat ki girawat darj ki jayegi. aur 2013 tak isamen har sal karib do pratishat ki girawat dekhi jayegi. praisawatar hausakoopar ki riport ne wijnyapanon men girawat ki bhi ummid jataee hai. yahi wajah hai ki akhabaron ke liye wijnyapanon men kami aaee hai. koopar ki riport ke hi mutabik khud midiya sansthan hi manate hain ki waishwik mandi aur wijnyapanon men girawat ke chalate we apana ghata 2011 men hi poora kar payenge. yani ummid ki kiranen bani huee hain.
aise men sawal uthata hai ki akhabar kaise bache rah sakate hain. praisawatar hausakoopar ki riport se saf hai ki pathakon ke bharose ke chalate wijnyapan udyog ka print par bharosa bana rahega. lekin yah bhi sach hai ki pathakon ke bharose ko banaye rakhane ke liye print ko naye-naye prayog bhi karane honge. isaki tasdik d ikonanmist ko diye apane ek intarawyu men midiya mugal roopart mardok ne bhi ki thi. unhonne kaha tha ki midiya hauson ne apane print sanskaranon ke jariye akoot kamaee to ki, lekin apane in dulare prakashanon ke tikaoo wikas ke liye anusandhan aur naye prayogon par paise kharch karane ke bare men kabhi nahin socha. kahana na hoga ki bharat ke bhi bade midiya sansthan mardok ki is bat se sahamat najar aa rahe hain. hal hi men ek karyakram aaeeyenayes ke adhyaksh aur banmbe samachar samooh ke pramukh hormsaji kama ko bhi kahana pada ki badalate daur ke mutabik khud ko naye roop men dhalane ke liye samachar-patron ko taiyar hona padega. isake liye shodhaparak adhyayan bhi karana hoga. aur to aur unhonne mana ki wahi akhabar bajar men majabooti ke sath khade rahenge, jo apani dijaina, le-aaut aur swaroop men nayapan lane ki safal koshish karenge.
jab-jab koee naya madhyam aata hai, purane ki maut ki aashanka jataee jane lagati hai. rediyo- tiwi ke aane ke dauran bhi aisa hi huaa tha. lekin naee chunautiyon se joojhate huye print madhyam ne khud ko majabooti se khada hone ka rasta talash liya tha aur aage badhate rahe. ye sach hai ki ek bar fir unake samane aisi chunauti aa khadi huee hai, lekin yah bhi sach hai ki isase nibatane aur khada hone ka rasta talash hi lenge.

taim ki maya ke samane khulate jindagi ke raj

umesh chaturwedi

maujooda pratispardha men kuchh naya karake apani pahachan banaye rakhate huye tiaarapi ki daud men aham sthan banaye rakhane ki antahin kawayad men manoranjan chainal bhi jut gaye hain. isake liye har chainal naye-naye aaidiya ko lekar aage aa raha hai. buddhu bakse ke parde par riyaliti sho ki bharamar isi ka natija hai. isi kadi men ek aur nam juda hai enaditiwi imaijin ke sho - raj pichhale janm ka. past laeef rigreshan sistam yani pichhali jindagi ko yad karake pichhali jindagi ke raj kholane wale is sho ki shurooaat sat disanbar se ho gaee hai. isaki shurooaat men tiwi aur film ki duniya ki pramukh aur bikaoo cheharon wali hastiyan masalan shekhar sumana, selina jetali, sanbhawana setha, monika wedi aadi bhi apani jindagi ke raj khol chuki hain, lihaja isaki charcha jamakar ho rahi hai. naye-naye aaidiya ki bajigari dikhane wali bharatiy tiwi ki duniya men choonki ye bilkul taja aur apani tarah ka anootha aaidiya hai, lihaja isaki or darshak aakarshit bhi ho rahe hain. lekin is sho aur isamen pesh kiye jane wali takanik aur usake jariye sanyogon ko jodane ko lekar sawal uthane shuru ho gaye hain.
isaki wajah bane hain mashahoor hastiyon ke poorw janm ke kathit khulase. manochikitsak dan. trpti jeeen ki madad se monika wedi ke pichhale janm ka jo raj khula, wah chaunkane wala hai. ye poori duniya janati hai ki monika wedi ko mafiya dann abu salem se sanbandhon ke chalate surkhiyon men rahin. unhen purtagal se pratyarpan ke jariye bharat laya gaya. un par abu salem ke sath kaee mamalon men mukadame bhi chale. poori duniya janati hai ki unhonne abu salem ke sath purtagal men sharan isaliye li thi, kyonki purtagal se bharat ki pratyarpan sandhi nahin thi. fir purtagal un deshon men shamil hain, jahan bhayankar aparadhiyon ko bhi maut ki saja nahin di jati. unhen aur unake purane dost abu salem ko kanoon ki ye barikiyan pata thin. isaka fayada we uthate rahe. na jane kitane papad belane ke bad hi bharat sarakar unhen yahan lane men kamayab ho paee. lekin raj pichhale janm men hissa lene ke bad unhen pata chala ki poorw janm men wah eesaee thin. itana hi nahin, unake tin bachche bhi the. jinamen se ek beti ka nam nima tha. unhen lag raha hai ki wah
eesaee dharm ki or aakarshit ho rahi hain. monika ka dawa hai ki pahale unhen isaki wajah pata nahin thi. lekin sho men aane ke bad unhen pata chala ki apane pichhale jiwan men wah eesaee thin.
bhojapuri filmon ki helan aur banliwud ki aaitam garl ke taur par wikhyat sanbhawana seth ko is sho men aane ke bad pata chala ki wah poorw janm men muslim ladaki thin. unaka pichhala janm achchha nahin tha. unake gharawale unapar kafi atyachar karate the aur bahut kam umr men hi unaki maut bhi ho gaee. baba ramadew ko chunauti dene wali sanbhawana seth apani aakramak chhawi ke liye bhi jani jati hain. achchhi aur bold dansar ke taur par wikhyat sanbhawana ko ab apani asal jindagi ke tar bhi pichhali jindagi men dikhane lage hain. is sho men pata chala ki we poorw janm men bar dansar thin. jahir hai ki is janm ke bold dans ke pichhe unaki poorw janm ki ye kahani hi wajah najar aa rahi hai.
teliwijan ki duniya ke supar star shekhar suman bhi is sho ke jariye apane poorw janm ka raj jan chuke hain. isake mutabik poorw janm men we british nagarik the aur unake yahan jabardast aag lagi thi, jisamen unake bachchon ki maut ho gaee thi. yahan ye bata dena jaroori hai ki karib pandrah sal pahale shekhar suman ke ek bachche ki hrday ki bimari ke chalate maut ho gaee thi. is sho men unhen is maut ke pichhe bhi poorw janm ki wah aag hi najar aaee. ye to huee sho men shamil hastiyon ki bata. chainal ka kahana hai ki is sho men nil nitin mukesh samet kaee aur hastiyan bhi shamil hongi. is sho men bhopal ki swati sinh bhi shamil ho chuki hain. jinhen 1966 men ek wiman hadase se gujarana pada tha. isaka dar un par is kadar baith gaya ki we wiman men baithane se hi ghabarane lagin. lekin is sho men aane ke bad pata chala ki unake pichhale janm ki kaee ghatanayen unake wyaktitw par hawi rahi hain.
jinhonne mahan manowaijnyanik sigmand frayad ko padha hai, unhen pata hai ki frayad ne karib ek sadi pahale hi bata diya tha ki har wyakti ka man daraasal do staron par sakriy rahata hai. ek chetana, jisamen wyakti ko pata hota hai ki wah kya kar raha hai ya fir kya padh raha hai. man ka ek star hota hai awachetana. isamen wyakti ka man anajane men hi apani jindagi aur apane aasapas ki ghatanaon ko rikanrd karate jata hai. frayad kahate hain ki sabakanshas ya awachetan ki jab bhi awastha aati hai ya fir wyakti kabhi sapane dekhata hai to awachetan ki ye ghatanayen hi use dikhaee padati hain. manochikitsak sammohan ke jariye awachetan men baithi dharanaon ko manorogiyon ke man se bahar nikalane ki koshish karate hain. is lihaj se dekha jay to raj pichhale janm ka – frayad ke usi siddhant ke aadhar par kam kar raha hai. is lihaj se yah wishay naya to nahin hai, lekin ise abhi sarwajanik taur par pahale kabhi pesh nahin kiya gaya hai, is arth men ye sho naya to jaroor hai. waise bhi aaj ki shahari jindagi men itane utar-chadhaw hain, itani samasyayen hain ki achchhe-bhale log bhi manasik wikaron ke shikar ho jate hain. ek anuman ke mutabik is desh men karib do karod log manasik rogon se pareshan hain. jahir hai, aise men is sho ko logon ki utsukata ki wajah to banana hi tha aur bana bhi hai. agar aisa nahin hota to is sho men hissa lene ke liye ab tak aath hajar log rajistard nahin ho pate. waise kisi ki niji jindagi men jhankana aur use lekar wyakhyayen sabake samane karana, us wyakti ki nijipan men sendh ka hi mamala hai. lekin jab samane wala khud hi apani jindagi ke raj poori duniya ke samane kholane ko utawala ho to is par sawal uthana hi bemani hai. lekin ye bhi sach hai ki kaee log ab bhi hain, jo apani purani ya pichhali jindagi ke raj kholane ko taiyar nahin hain. aur to aura, is karyakram ko pesh kar rahe bhojapuri filmon ke abhineta rawi kishan ab tak isake liye taiyar nahin ho paye hain. kaha to ye ja raha hai ki we apani pichhali jindagi ke khulase ko lekar dare huye hain. lekin ek sach to ye bhi hai ki unhen kahin na kahin ye lagata hai ki unake wigat ke khulase se unaki ab tak ki bani-banaee chhawi par nakaratmak asar pad sakata hai.
chainalon ki aapasi galakat pratiyogita men ab patrakarita ki purani manyatayen dhoomil padati ja rahi hain. kihol yani bedaroom men jhankane wali patrakarita sabhy samaj men ab bhi swikary nahin hai. lekin bajar men bane rahane aur tiaarapi wali nanw ki pahali sit par sawari karane ka dabaw itana jyada badh gaya hai ki manyataon ki parawah koee nahin karata. chainal par apane astitw aur aarthik sankat ka dabaw kam karata hai to wyakti ki niji jindagi men chamatkar ki ummiden use sab kuchh karane ke liye majaboor karati hain. raj pichhali jindagi ka jaisa sho bhi donon tarah ke dabawon ke kolaj se taiyar hai. lekin hamen ye nahin bhoolana chahiye ki abhi kuchh hi mahine pahale sach ka samana nam ka ek sho aaya tha. wahan sachaee ka samana karana aur dekhana to shuru men darshakon aur pratibhagiyon ko achchha to laga, lekin ab usaki charcha bhi kabhi-kabhar hi ho pati hai. sach ka samana ka maujooda hashr is bat ka gawah hai ki agar raj pichhale janm ka men bhi agar samasyaon ka duharaw hota raha to taja aaidiya wala bhi ye sho jyada din tak logon ko draing room men sath baithane ki wajah bana nahin rah sakega.

bhadesapan ki buddhu bakse men prabhawi dastak

umesh chaturwedi
buddhu bakse ke parde par bihar aur uttar bharatiy hindi bhashiyon ko ab tak darabana, chaparasi aur majak ka patr banate rahe uttar bharatiy hindibhashi ab kahaniyon ke kendr men hain aur maje ki bat ye hai ki inaki upasthiti ab tiaarapi ki daud men safalata ki garanti bhi mani ja rahi hai. agale janam monhe bitiya hi kijau, sabaki jodi wahi banata-bhagyawidhata, tere mere sapane, na aana is des lado aur bairi piya jaise dharawahik is bat ki tasdik kar rahe hain ki bajar ke dabaw men bhi kabhi hansod aur majak ke paryay rahe uttar bharatiy chhote shaharon ki prshthabhoomi wali kahaniyan bhi ab buddhu bakse ke na sirf kendr men hain, balki wijnyapan ke bajar ko niyantrit karane wali taim jaisi khalis angreji dan kanpani ki reting men bhi awwal sthan banane men kamayab rahi hain.
padhe-likhe hone ka dawa karane wale dilli, munbaee aur kolakata jaise mahanagaron men bhale hi satta wimarsh ke kendr men bihar aur uttar pradesh ke log aane lage hain, isake bawajood unhen lekar in mahanagaron ke sath hi inake aasapas ke ilakon ke logon ka aagrah kam nahin huaa hai. dilli ki sadakon par bihari shabd aaj bhi samman ka patr nahin hai, munbaee men bharatiy janata parti aur shiwasena ko dhool chatane ki haisiyat rakhane wala poorwi uttar pradesh aur bihar ka samaj un kangresi karyakartaon ki najar men bhi samman hasil nahin kar paya hai. isake bawajood wah mayanagari jaise khalis angreji dan hathon se sanchalit hone wale teliwijan dharawahikon ki duniya men is ilake ki desaj prshthabhoomi wali kahaniyan aur desaj patr pramukh patr sanbhrant warg ke draing room tak prabhawi asar bana paye hain to hairatabhare sawal uthenge hi.
chahe aajadi ka aandolan raha ho ya fir bad ke daur men dilli ki gaddi par kabje ki ladaee, uttar bharat ki khas bhoomika rahi hai. angrejon se loha lene men ganga-ghaghara ki upajaoo mitti se nikale sapooton ne aham bhoomika nibhaee. aajadi ke bad 1991 tak dilli ki gaddi par wahi kabij hota raha, jisane uttar bharat ke sabase bade ilake uttar pradesh aur bihar ke adhikansh logon ke dilon par raj kiya. pibi narasinh raw pahale pradhan mantri rahe, jinaki parti ko in donon rajyon se pahale ki tarah samman aur pyar hasil nahin ho paya. isake bawajood is ilake ke logon ko samajik wimarsh men wah sthan nahin mil paya, jisaka wah hakadar tha. lekin yah halat ab badal rahi hai. angreji warchasw wali teliwijan ki duniya men wimarsh aur kahani ka kendr ban rahe is samaj ki bhi swikaryata badhane lagi hai. yah swikaryata hi hai ki chahe agale janam mohen bitiya hi kijau ho ya fir sabaki jodi wahi banata-bhagy widhata, theth uttar bharatiy samaj ka pratinidhitw karane wali kahani aur usake desaj patr ab kendriy bhoomika men hain. ab unaki kahani bhi sanbhrant samajhe jane wale pariwaron ke logon ki aankhon se bhi aansu lane ke liye majaboor kar rahe hain.
pahale angrejon ke khilaf joradar ladaee ladane wale is ilake ne wikas ki daud men pichhadakar kafi kimat chukaee. aajadi ke bad dilli ki gaddi ke dawedaron ne is ilake ke woton ke liye is ilake ke logon ki tabedari to ki, lekin ye bhi sach hai ki unhen wikas ki jaisi chikani aur saf-saffak sadak milani chahiye thi, wah nahin mili. isake liye ilake ke rajaneta bhi jyada jimmedar rahe. kheti ke sath pradhanamantri aur asaradar mantriyon ki bharapooj upaj yahan ki dharati rajaniti aur samaj ko deti rahi, lekin jo hariyali yahan ke cheharon par aani chahiye thi, usase yahan ke chehare hamesha maharoom rahe. sanwidhan ke sankalp ke mutabik aajadi ke pandrah sal bad bhi angreji is desh ke rajakaj aur bhagyawidhata ki bhoomika se alag hoti najar nahin aaee to danktar ramamanohar lohiya ki aguaaee men angreji hatao aandolan men isi ilake ne joradar bhoomika nibhaee. aaj samajawadi dhara ki rajaniti men nitish kumara, lalu yadawa, mulayam sinh yadaw jaise log asaradar bane huye hain, usake pichhe bhi kahin na kahin lohiya ka ye aandolan bhi raha hai. lekin durbhagy ye ki is pidhi ke adhikansh netaon ne satta ki sawari karane ke bad apane is aandolan aur aandolan ki sathi rahi apani janata ko bhi bhulane men der nahin lagaee. jab karnadhar hi apane logon ka samman nahin karenge, duniya kyonkar sammanit karati. doosari bat ye huee ki angreji wirodhi aandolan ke bawajood hindi ka warchasw rajakaj ki duniya men nahin badha to angreji ko lekar ek khas tarah ki kattarata ka bhi wistar huaa. in kattarawadiyon ki najar men angreji na janane wale log hansod aur majak ke sath hi upahas ke hi patr ban gaye. kahana na hoga, filmi duniya ho ya fir teliwijan ka roopahala sansar - wahan bihar ya uttar pradesh ke log bhades aur desaj roop men hi samane aate rahe. bad ke daur men bhrashtachar ke aaropon ke bich jab rajaniti widooshak jaisi bhoomika men aa gaee to is ilake ke log aur bhi jyada majak aur daya ke patr ban gaye. sahi mayane men filmi aur teliwijan ke parde bhi isi duniya ki hi kanpi kar rahe the.
yahin par yad aate hain khushawant sinha. bharatiy angreji lekhan aur patrakarita men khushawant sinh sammanit nam hai, lekin khanti hindibhashiyon ko unaki kaee tippaniyan chubhati rahi hain. hindi ki duniya men bhi samman ke sath padhe jane ke bawajood hindiwalon ko lekar unake wichar aagrahi hi rahe hain. ek bar unhonne hindi ki sanpreshaniyata par yah kahate huye sawal uthaya tha ki usake pas rait aur maus ke liye ek hi shabd chooha hi hai. isi tarah unaki najar men uttar bharatiyon ne choonki angreji ki padhaee nahin ki – yahi wajah hai ki unhen jyadatar daraban ya chaparasi ki naukariyan hi karani padin hain. khushawant sinh bhi bharat ke usi angrejidan tabake ke hi pratinidhi rahe hain. jinaki soch hindibhashiyon aur khasakar uttar bharatiyon ko lekar poorwagrahi rahi hai.
halanki uttar bharat ki taswir ka ek ujala paksh bhi hai. bhadesapan aur desaj sanskaron ke sath hi angreji wirodh ke chalate jo uttar bharat aur bihar kathit sanbhrant bharatiyon ke liye aashanka ki wajah rahe hain, wahan padhaee ko lekar bhi khasatarah ki bhookh badhi hai. kendriy siwil sewaon ke liye yahan ke chhatron ke utsah ko dekhiye ki ye parikshayen aayojit karane wale sangh lok sewa aayog ki hi pichhale sal ki ek riport batati hai ki 2015 tak desh ke sabhi takariban chhah sau jilon ka diyem ya esapi ya fir donon bihari hi hoga. is bich bhadesapan aur jangalaraj ka paryay rahe bihar men bhi badalaw ki bayar bah rahi hai. wahan bhi satta tantr ko lekar bharosa badha hai. halanki wah bharosa bhi abhi kafi nahin hai. lekin badalaw ki shurooaat ne desh ki soch bhi badali hai. lihaja ab bihar aur uttar pradesh ke log bhi samajik aur rajanitik wimarsh ke kendr men hain. unaki chintaon aur pareshaniyon ki or bhi dhyan ja raha hai. yahi wajah hai ki ab kisi chainal ka dhyan tere mere sapane ke jariye ab khalis uttar bharatiy ganwon ke sapane bechane ka bahana mil gaya hai ya fir agale janam mohen bitiya hi kijau ki lali ke bahane bihar ki ladakiyon aur jamindari pratha ki kuritiyon ko bechane ka bajar banane laga hai.
yahan hamen ye nahin bhoolana chahiye ki uttar pradesh aur bihar ke logon ko apani yooyesapi apana desaj swaroop hi najar aati rahi hai. usi desaj se desh ka sanbhrant kism ka ilaka parahej karata raha hai. parahej hi kyon hansi bhi udata raha hai. film aur teliwijan ki duniya bhi isaka apawad nahin rahi hai. prakash jha, shatrughn sinha aur aashutosh rana jaise khanti hindi aur desaj prshthabhoomi wale logon ke filmi duniya men aane ke bawajood bhi mayanagari ke najariye men khas badalaw nahin aaya. lekin ab ise lekar badalaw najar aa raha hai to isaki ek matr wajah sirf siyasi pariwartan ka chakr hi nahin hai. hamen yah nahin bhoolana chahiye ki hansi ka patr rahe is desaj ilake men bhi bajar ne naye tarah se paith banaee hai. nishchit taur par isamen siyasi badalaw ki bayar ne yahan ki khushahali men aham bhoomika nibhaee hai. isake sath hi pichhale do dashak se yah ilaka jis tarah kendriy rajaniti men bhoomika nahin nibha pa raha tha, usamen bhi badalaw aa raha hai. ab yah ilaka ek bar fir rajanitik aur samajik wimarsh ki duniya men prabhawi bhoomika nibhane ki taiyari men jut gaya hai. is ilake ke manas men ek badalaw ye bhi aaya hai ki ab yah bhoomika khali hath nahin nibhaee jayegi, balki isaki kimat bhi wasooli jayegi. jab samaj is tarah uth khada hota hai, use wimarsh ke kendron ko bhi uchit ahamiyat deni padati hai. kahana na hoga- film aur teliwijan ki ye duniya bhi wahi kar rahi hai. is samaj ko sammanit kar rahi hai.

hwait haus men hindi ka jayaghosh

umesh chatu्rwedi
hindustani mahanagariy upekshabodh ke bich lagatar takatawar ban rahi hindi ne hwait haus tak men dastak de di hai. is dastak ka jariya hamare apane rajaneta ya hindibhashi hastin nahin bane hain. duniya ke sabase bade satta ke kendr hwait haus men hindi ka ye jayagan duniya ke sabase takatawar aadami ki jaban ke jariye huaa hai. hwait haus men bharatiy pradhanamantri ke samman men diye bhoj men pahunche manamohan sinh ka theth hindi men hi swagat kiya. unhonne bhale hi sirf ek lain – aapaka swagat hai- bolakar ameriki dharati par sirf bharatiy pratinidhimandal ka dil hi nahin jita hai, balki ye saf sandesh de diya hai ki hindi aur use bolane wale karib pachas karod logon ko lekar usaka najariya kaise badal raha hai. ameriki dharati par hindustani logon ki dhamak ko mahasoos karane ke bad unaki matrbhasha ko is tarah sammanit karane ka bhale hi ye pahala mauka hai, lekin isase saf hai ki aane wale dinon men ameriki rajaniti ke liye hindi aur hindustani log kitani aham hone ja rahi hai.
bajarawad ke badhate daur men bhale hi hindi bajar ki ek badi takat ban gaee hai. lekin yah bhi sach hai ki ab bhi yah niti niyantaon aur abhijan samaj ke niyamit wimarsh ka jariya nahin ban paee hai. doosare deshon ki kaun kahe, bharatiy abhijan samaj aur niti niyanta ab tak apani soch aur wimarsh ki bhasha ke taur par hindi ko sahajata se apana nahin paye hain. kahana na hoga, udyoga, samaj aur rajaniti ki duniya men nitiyon ke prabhawit karane wala ye samaj jyadatar mahanagaron men hi rahata hai aur usaki dainandin ki bhasha wahi angreji hai, jisaka amerika aur briten men sahaj wyawahar hota hai. daraasal hamara aaj jo abhijan samaj hai, usake paimane amerika aur briten ke samajik chalan se hi prabhawit hote hain. yahi wajah hai ki roji aur roti ki bhasha ke taur par hindi ke badhate kadam ke bawajood aaj bhi use lekar mahanagaron men ek upekshabodh bana huaa hai. kahana n hoga ki is upekshabodh ki shurooaat usi british aur ameriki manasikata ke hi jariye huee thi. ye bidanbana hi hai ki hindi ko lekar ye upekshabodh usaki apani hi dharati par bana huaa hai, lekin jahan se is upekshabodh ka bij panapa tha, wahan ki rajaniti ise lekar udar hoti najar aa rahi hai.
ye sach hai ki hindi ko lekar duniya ki mahashakti ka najariya badal raha hai. isake bawajood usane pichhale sal yani 2008 men tis sitanbar ko apani rediyo sewa wanyas ऑf indiya ki hindi sarwis ko band kar diya. ye sach hai ki wanyas ऑf amerika ki hindi sewa bharat men bibisi ki tarah lokapriy nahin rahi hai. isake bawajood use chahane walon ki kami nahin rahi hai. yahi wajah hai ki tab hindi sarwis ki aawaj band hone ki khabar ne hindi premiyon ke ek bade tabake men mayoosi bhar di thi. janrj bush ne jate-jate hindustani logon ko joradar jhataka diya tha. lekin obama ka najariya badala najar aa raha hai. aisi khabar hai ki obama ki sarakar ek bar fir se hindi sewa ko shuru karane ja rahi hai. ye sach hai ki 54 sal pahale jab hindi sarwis ki shurooaat huee thi, tab shitayuddh ka jamana tha aur is sarwis ke jariye ameriki sarakar ka uddeshy apani nitiyon ko lekar propeganda karana tha. lekin 1990 men sowiyat sangh ke bikharaw ke bad se shitayuddh ka daur khatm hota chala gaya. isi bich bharat aur ameriki sanbandhon ne naya itihas rach diya. bush ke hi daur men bharat aur amerika ke bich etami samajhauta huaa. is samajhaute ke sath hi hindi – ameriki bhaee-bhaee ki naee ibarat likhi gaee. lekin isi bush ke liye hindi sarwis begani hoti chali gaee. lekin ab amerika ka najara badal raha hai. yahi wajah hai ki hindi sarwis ki shurooaat ki khabaren aur hwait haus men hindi ka jayagan ko ghosh takariban sath-sath sunaee pada hai.
waise hindi ko lekar mahashakti ka najara yoon hi nahin badala hai. sath karod ke wishal madhy warg ke sahare bharat duniya ke liye bada bajar banata najar aa raha hai. waishwik aarthik mandi ke is daur men bhi tike rahakar bharatiy arthawyawastha ne sabit kar diya hai ki ameriki bajarawad ke daur men bhi usamen kafi damakham hai. yahi wajah hai ki duniya ke sabase takatawar satta kendr ki najar men na sirf hindustani loga, balki usaki bhasha sabase badi takat banakar ubhari hai. duniya ki sabase badi takat janati hai ki bharatiy bhoomi par angreji bhale hi wimarsh ki aaj bhi majaboot bhasha bani huee hai. lekin ye sach hai ki aam logon se sahaj sanwad aur un tak apani bat pahunchane ka jariya hindi hi ban sakati hai. karib pachas karod logon ka dil angreji ki bajay hindi ke jariye hi jita ja sakata hai. use ye bhi pata hai ki bajar aaj hindi ki is takat ko pahachan gaya hai aur usaka mauka-bemauka istemal bhi kar raha hai. isi hafte aaee ek khabar ne wikasit sarajamin par hindi ki badhati pahunch aur pakad ko hi jahir kiya hai. global laingwej mannitar (jiyelayema) ke mutabik ऑskar wijeta film 'slamadang milineyara' ke ek git ke bol men shamil jumala 'jay ho' duniya ke sarwadhik lokapriy shabdon ki list men 16wen nanbar par aa gaya hai. jabaki hindi filmon ke liye istemal hone wala shabd 'banliwuda' 17wen payadan par hai. saf hai ki hindi ko lekar wikasit duniya ke aam manas ka bhi najara badal raha hai. aise men duniya ka sabase bada satta kendr manamohan sinh ka hindi men swagat karake daraasal wikasit duniya men hindi ko lekar aaye badalaw ko hi rekhankit kar raha hai.
hwait haus tak hindi ne dastak de di hai. lekin sabase bada sawal ye hai ki kya wikas aur takat ke sath hi sabhyata aur salike ke liye amerika ko apana paimana bana chuke bharatiy mahanagariy manas ko hindi ka ye jayaghosh jhakajhor payega .

andhere khoh men bhatakati patrakarita shiksha

umesh chaturwedi
takaniki shikshan ka apana ek anushasan hota hai, usaki apani jarooraten hoti hain. yahi karan hai ki injiniyaring aur medikal ki na sirf shiksha hasil karana, balki unaki shiksha dena behad chunautibhara kam mana jata raha hai. ab prabandhan ki shiksha ke sath bhi waisa hi ho raha hai. kyonki prabandhan bhi ek tarah se takanik hi hai, sirf akadamik shikshan ya padhaee bhar nahin hai. aise men sawal ye uthata hai ki patrakarita ki padhaee aur usaka shikshan takaniki shikshan-prashikshan ke dayare men aata hai ya nahin. jahir hai jyadatar log isaka jawab han men hi denge. patrakarita ki padhaee karane aa rahe chhatr aur unake abhibhawak kam se kam ise takaniki shikshan aur prashikshan ke dayare men man rahe hain. shayad yahi wajah hai ki midiya wisfot ke is daur men hajaron-lakhon roopaye ki moti fis dekar chhatron ki bhari bhid patrakarita ke shikshan sansthanon ka rookh kar rahi hai. lekin dimd wishwawidyalayon ke sath hi swawittaposhit wishwawidyalayi pathyakramon men jis tarah patrakarita ki padhaee ho rahi hai, usase saf hai ki apani tarah se khas is anushasan ki padhaee ko lekar chhatron aur unake abhibhawakon men thage jane ka bhaw badha hai. isaka asar bhawi patrakaron ki gunawatta par bhi pad raha hai. waicharik bahason men jis tarah patrakarita in dinon nishane par hai, usake pichhe patrakarita shikshan ke maujooda dharre ki kitani bhoomika hai, ise lekar sawal nahin uth rahe hain. lekin ab wakt aa gaya hai ki patrakarita shikshan ko profeshanal jarooraton ke nikash ki bajay takaniki anushasan ke sath hi waicharik dharatal par bhi parakha jaya.
udarikaran ke bad aaye midiya wisfot ke is daur men jis tarah takanik par patrakarita awalanbit hoti gaee hai, isase saf hai ki bajar men takaniki kasauti par khare utarane wale bhawi patrakaron ki mang badh gaee hai. sirf isi ek aadhar ke chalate khabaranawisi ke shikshan ko injiniyaring aur medikal ki tarah takaniki anushasan ka shikshan aur prashikshan mana ja sakata hai. choonki patrakarita injiniyaring aur medikal ki tarah kora takanik hi nahin hai, balki yahan waicharikata na sirf poonji hai, balki ek bada aujar bhi hai. hindi patrakarita ke shalaka puroosh rajendr mathur bhale hi kahate rahen ki patrakar itihas nirmata nahin, balki usake aise darshak hote hain, jo apani paini nigah ke jariye aam logon ko in ghatanaon se parichit karate hain. lekin ye bhi sach hai ki apani waicharikata ki poonji ke jariye hasil najariye ke chalate we maujooda ghatanaon ke prati logon ko sachet ya fir utsahit bhi karate hain. taki aane wala kal jab wigat ke kal ka itihas ke taur par moolyankan kare to use koee pachhatawa na rahe. jahir hai ye drshti kisi wishwawidyalay ya patrakarita shikshan-prashikshan sansthan ke klasaroom se hasil nahin kiye ja sakate. agar aisa hota to bharatiy patrakarita ke shurooaati puroosh chahe jems ऑgastas hikki hon ya anbika prasad wajapeyi ya fir babu raw wishnuraw paradakara, unhen patrakarita ki duniya men yad bhi nahin kiya jata. kyonki unhonne kisi sansthan se khabaranawisi ya waicharikata ki trening hasil nahin ki thi. aaj ke daur men bhi prabhash joshi, achyutanand mishra, pranay rany ya winod duaa jaise kaee chamakate nam hain, jinaki patrakarita ka prashikshan kisi wishwawidyalay ya sansthan men mila ho. baharahal aaj ke daur men bina khas shikshan ya prashikshan ke kisi patrakar ki ummid nahin ki jati, jaise bina kisi injiniyaring ki padhaee ke injiniyar ya medikal ki padhaee ke danktar ki ummid ki jati hai. agar aisa hoga to us par sawal uthane lajimi hain. hakikat men aaj ka patrakarita shikshan apane uhapoh se mukt nahin ho paya hai. usaki koshish ya khula dhyey hai pranay rany aur prabhash joshi jaisa paranparik aur shreshth waicharik patrakar banana hai, jo aaj ki takanik par bhi khara utare. lekin usaka sabase bada sankat ye hai ki wah ab tak ye tay nahin kar paya hai ki patrakarita ka prashikshan takaniki hai ya waicharika. isake liye jitana patrakarita ke sansthan jimmedar hain, utana hi doshi sarakar bhi hai. agar aisa nahin hota to aaj tak patrakarita ka ekanishth pathyakram taiyar ho chuka hota. injiniyaring aur doosare takaniki sansthanon ki manyata ke liye bakayada takaniki shiksha parishad hai, medikal ki padhaee par nigah rakhane ke liye medikal kaunsil hai. lekin itihas par nigah rakhane wali padhaee ke liye aisi koee regyuletari sanstha nahin hai. yahi wajah hai ki kukuramutton ki tarah uge dimd wishwawidyalayon aur kathit takaniki sansthanon ke sath patrakarita padhane ke liye maidan men kood pade hain. is kadi men swawitt poshit yojana ke tahat jane-mane wishwawidyalay bhi shamil ho chuke hain. isaka asar hai ki adhikansh sansthanon ke pas kitabon aur laib ka jabardast tota hai. lekin padhaee chalu hai. niji sansthan moti fis ke badale dheron sabjabag dikha rahe hain. wahin swawittaposhit wibhagon ke nam par wishwawidyalayon ya purane kanlejon men patrakarita wibhag kam fis le rahe hain. lekin suwidhaon ke mamale men unaki bhi wahi halat hai, jo chamakati bilding wale niji sansthanon ki hai.
awwal to adhikansh sansthanon ya wishwawidyalayon men koee manak pathyakram hi nahin hai. rahi bat unhen padhane walon ki to yogyata ki kasauti par khare utarane wale kam hi log bhawi patrakaron ko padhane men jute hain. swawittaposhit sansthanon ke taur par jin wishwawidyalayon ya kanlejon men patrakarita ki padhaee ho rahi hai, wahan patrakarita wibhag ya to hindi wibhag ki dasi hai ya fir angreji wibhag ka doyam darje ka sathi. hindi ya angreji wibhag ke thass widwan apane ko patrakarita ka purodha bhi man baithe hain. unhen bajar aur takanik se kuchh lena-dena nahin hai. unake liye patrakarita ka shikshan sheksapiyar ke natakon ya premachand ki kahaniyon ki padhaee jaisa hi hai. unhen ye bhi pata nahin hai ki patrakarita shikshan ki duniya men kranft aur akadamik najariye ko lekar koee bahas bhi chal rahi hai. bharatiy patrakarita khas taur par takanik aur kantent ke sath pahunch ke star par kis payadan par ja pahunchi hai, isaka saf andaja adhikansh patrakarita sansthanon aur wahan padha rahe logon ko nahin hai. jahir hai isaka khamiyaja wah pidhi bhugat rahi hai, jo jems hikki ya anbika prasad wajapeyi na sahi, prabhash joshi aur pranay rany banane ke liye patrakarita ki padhaee ke samandar men kood padi hai.
jahan thik-thak patrakarita shikshan ho raha hai, wahan kranft aur akadamik jor ko lekar rassakashi jari hai. jin adhyapakon ka profeshanal patrakarita se sabaka nahin pada hai, we sanchar ke siddhanton ke parayan aur path se chhatron ko jodana achchha lagata hai. lekin wijiting faikalti ke nam par profeshanal jab klas room men aate hain to we takanik par hi jor dete hain. jahir hai unake shikshan ka mukhy fokas takaniki janakari aur takanik ke aadhar par kantent ko kasana sikhana hota hai. agar we akhabar se huye to unaki duniya janasatta aur taims ऑf indiya ke nyooj room ke ird-gird hi ghoomati hai. agar teliwijan ki duniya se huye to ji nyooja, enaditiwi ya aajatak ka nyoojaroom hi unaka aadarsh hota hai. is asar se patrakarita prashikshan pane ke bad profeshanal sansthanon men trening ke liye jane wale chhatr bach nahin pate. unhen munh bichakakar unaki saiddhantik padhaee ka majak udane men koee kasar nahin chhodi jati. kranft aur akadamik ko lekar atiwadi jor daraasal ek tarah ka atiwad hi hai. har takanik aur kranft ka apana ek siddhant bhi hota hai. akadamik duniya ko is saiddhantikata ke aadhar ko khojana aur usaki kasauti par kranft ko wishleshit karana hota hai. is tarah se padhe aur gune chhatron men jo drshti wikasit hoti hai, usamen maulikata ki gunjaish jyada hoti hai. lekin durbhagy se aisa nahin ho raha hai. jisaka asar aaj patrakarita ki profeshanal jindagi men khoob dikh raha hai. sawalon ke ghere men patrakarita roj aa rahi hai. naee pidhi ke patrakaron men maulik drshti ka abhaw saf najar aata hai. agar maulikata dikhati bhi hai to unhen prayog karane ke liye jaroori samarthan dene wale sahasi siniyar ki bhi kami saf najar aati hai.
saf hai takanik aur akadamik ke jhanjhat se mukt huye bina patrakarita ki apani waicharik jaroorat par aadharit patrakarita shikshan ke intajam nahin kiye jayenge, sawal to uthate hi rahenge. makhanalal chaturwedi patrakarita wishwawidyalay ne patrakarita shikshan ki isi kami ko dhyan men rakhate huye pres kaunsil ऑf indiya aur wishwawidyalay anudan aayog ke sahayog se patrakarita pathyakram men ekaroopata lane aur sansthanon ke sath hi padhane wale logon aur sansthanon ke manakikaran ki disha men kadam uthaya hai. jaroorat is bat ki hai ki profeshanal duniya ki jarooraton ke mutabik patrakarita shiksha dhale, lekin akadamikata ko bhi najarandaj na kiya jaye. jad najariye wali akadamikata ke bojh tale daba patrakarita shikshan na to akadamik duniya ke liye mufid hoga na hi akhabari aur tiwi sansthan ko hi fayada pahuncha payega. aur patrakarita ki medha ka jo nukasan hoga, usaka aakalan to aane wali patrakariy pidhiyan hi kar payengi.

nahin rook payega hindi ka karawan

umesh chaturwedi
sitanbar ke mahine jaise-jaise najadik aata jata hai, sarakari daftaron ke us khas wibhag ki raunak badhane ki kawayad shuru ho jati hai, jise hindi athawa rajabhasha wibhag kaha jata hai. aise mahaul men hindi ke pakhand diwas ke karib ek pakhawada pahale kendr sarakar ka mantri hindi ki padhaee ko jaroori banane ki himayat karata huaa bayan de to hairat hona swabhawik hi hai. manaw sansadhan mantri kapil sibbal ke is bayan par shak ki gunjaish bhi isaliye jyada hai, kyonki hindi aise bayanon ke jariye karib unasath sal se thagi jati rahi hai. rajabhasha ko hakikat men wah hak ab tak nahin mil paya, jisaki wah swabhawik taur par hakadar hai.
rajanitik bayanon ki ganbhirata ko hamesha itihas aur wigat ke kadamon ke aadhar par parakha jata raha hai. lekin hamen ye nahin bhoolana chahiye ki kapil sibbal angreji ke dhuaandhar wakta hain. kangres parti ka prawakta rahate unhonne pres ko apani parti se sanbandhit jitani janakariyan angreji ke jariye di thin, shayad hi hindi men di hongi. sansad men bhi chahe wipakshi sadasy ke taur par bahas men hissedari rahi ho ya fir mantri ke taur par bahason ka jawab dena, kapil sibbal angreji ko hi sahaj manate rahe hain. aise kapil sibbal agar deshabhar ke skoolon men hindi padhaye jane ki wakalat kar rahe hain to ise samany bayan bhar manakar upekshit nahin kiya jana chahiye.
daraasal kapil sibbal ke is sujhaw ki wajah jo chintayen hain, usi pakhawade rashtriy swayansewak sangh ke poorw pramukh kup si sudarshan ne jahir kiya hai. kangres ke ek mukhar neta ke sath sangh ke poorw pramukh ke bayanon ko jodana kuchh logon ko bhale hi galat lag sakata ho. lekin hakikat yahi hai. sudarshan ne kaha hai ki angrejiyat is desh ki sanskrti ko bigad to rahi hi hai, desh men ekata ki bhawana par bhi asar dal rahi hai. kapil sibbal ne bhi jab hindi padhane ki wakalat ki to unaka bhi yahi kahana tha ki hindi ki padhaee ke jariye deshabhar ke bachche ekata ke sootr men bandh sakenge.
ye kadawi sachaee hai ki sarakari koshishon ke jariye hindi apana asal mukam hasil nahin kar paee. doosare shabdon men kahen to hindi ko usake asal mukam par pahunchane men sarakari khel ne jyada adanga lagaya. hindi ko dasi banaye rakhane ki sarakari kawayad ki shurooaat 1965 men hi ho gaee thi, jab bhasha sanbandhi sansad ke sankalp men ye tay kar diya gaya ki jab tak ek bhi rajy sarakar hindi ke rajabhasha hone ka wirodh karati rahegi, use wyawaharik taur par rajabhasha nahin banaya ja sakega. sach to ye hai ki ye sankalp bad men aaya, lekin usaki poorw pithika 21 nawanbar 1962 ko hi ban gaee thi. is din gathit nagalaind rajy ki rajabhasha hi angreji hai. jahir hai ki nagalaind jaise rajy hindi ko kyonkar apanane lage. sath ke dashak men tamilanadu men ubhare hindi wirodh ke liye gulajari lal nanda ke ek aadesh ko jimmedar mana jata hai. mashahoor patrakar kuladip naiyyar ne apani pustak skoop men is ghatana ka jikr kiya hai. daraasal sanwaidhanik prawadhanon ke chalate 26 janawari 1965 se hindi ko rajabhasha ke taur par angreji ka sthan le lena tha. ise dekhate huye hi bataur rajabhasha wibhag ke incharj mantri ke nate nanda ne ye aadesh diya tha. lekin pahale se jari kendriy satta men hindi wirodh ki manasikata ke chalate tamilanadu ke netaon ko ye pracharit karane ka mauka mil gaya ki kendr sarakar gairahindi bhashi rajyon par jabardasti hindi thopana chahati hai. nanda ji ko apani galati ka ahasas huaa aur yah aadesh wapas le liya gaya. lekin jo galati honi thi, wah ho gaee thi. jisaka khamiyaja tamilanadu men khooni sangharsh ke taur par dikha. aandolan ki riporting karane dilli se pahunche patrakaron ko tab ke madras aur ab ke chennaee men ऑto walon se apane hindi sawalon ke jawab men hindi men hi sunane ko mila – ham hindi nahin janata. yani hindi janane wala bhi apani kshetriy asmita aur sthaniy rashtrawad ko bachane ke nam par hindi ka wirodhi ho gaya tha. is aandolan ne tamilanadu men sarakari taur par na sirf hindi ko lagu nahin hone diya, balki kendr sarakar ko hindi ki usaki asal jagah par baithane ke apane sankalp ko anant kal tak talane ka mauka jaroor de diya.
sarakari shadayantr ke chalate hindi wyawahar men rajabhasha bhale nahin ban paee, lekin 1991 men shuru huye udarikaran ke daur ne hindi ko naee pahachan dilaee. beshak yah niti banane walon ki bhasha nahin ban paee hai, lekin bajar ki sabase pramukh bhasha jaroor ban gaee. aur to aur jis rajy ne hindi wirodh ke nam par khoon bahaya, basen jalaeen aur sarakari sanpatti ko nukasan pahunchaya, ab us tamilanadu ke log bhi apane bachchon ko hindi padhane ke liye protsahit kar rahe hain. pichhale dinon ek pramukh angreji dainik ke chennaee sanwadadata ne khabar di ki sath ke dashak ke hindi wirodhi aandolanakari pidhi bhi ab apane bachchon ko hindi padhane ke liye badh-chadhakar hissa le rahi hai. tamilanadu men badalaw ki ye bayar ki asal wajah udarikaran hi hai. isi ke chalate 1995 men duniya ki jin panch bhashaon ko star samooh ke malik roopart mardok ne bhawishy ki takatawar bhashayen bataya tha, usamen hindi bhi thi. mardok janate the ki hindi men bajar ko duhane ki akoot takat hai. yahi wajah hai ki star samooh ke chainalon ka bharatiy aasaman par hamala huaa aur dekhate hi dekhate star samooh bharat ki ilektrannik midiya kranti ka aguaa ban gaya. hamare shasak bhale hi hindi ko nakarate rahe, lekin jinaki badaulat hindi apane aham sthan se door huee, usi shasak warg angrej kaum ke hi ek prabhawi shakhs ne hindi ki takat ko pahachanane men bhool nahin ki.
aaj agar kapil sibbal hindi ki wakalat kar rahe hain to isaki wajah ye nahin hai ki unaki parti ke pahale ke kartadhartaon ne jo kiya, use lekar unake man men koee pashchatap hai. ya fir we us bhool ko sudharana chahate hain. hakikat to yahi hai ki angrejiyat ke warchasw ke is daur men bhi hindi apani takat badhati ja rahi hai. kashmir se lekar kanyakumari taka, gujarat se lekar us nagalaind taka, jisaki rajabhasha angreji hai, hindi ko janane-bolane, samajhane aur gunagunane walon ki sankhya badhati ja rahi hai. sarwochch adalaton tak men use lagu karane ke liye mang badhati ja rahi hai. dilli haeekort men hindi men sunawaee aur insaf ko lekar tin hajar se jyada wakilon ka maidan men kood padana koee kam nahin hai. jahir hai, apane wistar men hindi ka sahara lekar takatawar bana bajar ab hindi ko bhi takatawar bana raha hai. ye takat hi hai ki hindi ko lekar angreji dan logon tak ka rawaiya badalata najar aa raha hai. isase saf hai ki aane wale dinon men hindi ki jayajayakar badhati hi jayegi. jaroorat is bat ki hai ki khanti hindi wale bhi is tathy ko samajhen aur apani takat ko sakaratmak tarike se is nek kam men lagayen.

andarakhane men bhi huee dil

umesh chaturwedi
yah lekh pratham prawakta ke 01 sitanbar 2009 ke ank men prakashit huaa hai.
bharatiy lokatantr men is bat par shak nahin hai ki is desh ka sabase takatawar pradhanamantri ka pad hai. jahir hai unhen niyantrit karane wali partiyon ke adhyaksh ki takat bhi kam nahin hogi. is desh men shayad hi koee manega ki kangres adhyaksh soniya gandhi aur unake nirdeshan men kam karane wale pradhanamantri manamohan sinh bhi midiya ke samane kamajor honge. lekin ye solah aane sahi hai ki pichhale aam chunawon men desh ki satta sanbhal rahe ye donon diggaj bhi kamajor sabit huye. chunawi samar ke dauran soniya gandhi aur manamohan sinh ko bhi midiya ko andarakhane men paikej dena pada. nam na chhapane ki shart par kangres parti ke hi ek rasookhadar neta ko is tathy ko swikar karane se gurej nahin hai.
chunaw ke dauran pratyashiyon ke paksh men khabar chhapane aur paise ya paikej dil na karane wale pratyashiyon ki khabaron ko sire se nakar dene ka aarop to midiya par lag hi raha hai. paise kamane ki is bahati ganga men hath dhone men desh ke kaee bade midiya gharanon ke bare men khuleaam sawal-jawab ho hi rahe hain. ise lekar aaropi midiya ko bhi bachaw men utarana pada hai. lekin ye bhi sach hai ki ek-yek wot ke jugad men lagi kangres aur bharatiy janata parti jaisi partiyon ne midiya ke ek bade dhade ki is jayaj-najayaj mang ke aage ghutane tekane men hi apani bhalaee samajhi. bharatiy janata parti ke sansad aur warishth patrakar chandan mitra desh ke bade khabariya chainalon par aarop laga hi chuke hain ki unhonne ek sangathan banakar partiyon se wijnyapan batore. lekin kangres neta ka khulasa isase aage ki bat bata raha hai. unhonne kaha ki kaee bade chainalon ne andarakhane men unase bina kisi rasid aur pakki khata-bahi ke bhi paise liye. isamen kaee bade aur nami patrakar bhi shamil hain. uttar pradesh ke ek neta ne bhi nam na chhapane ki shart par bataya ki ek chainal ne to bakayada biyesapi ke netaon se bhi andarakhane men diling ki. jisamen usake sanpadak ka hi bada hath raha.
waise sthaniy aur jila star par aise aarop pahale bhi lagate rahe hain. kuchh tathyon men sachchaee bhi rahi hai. kuchh ek log rashtriy star par bhi aisa karate rahe honge. lekin aamataur par patrakarita ke mool manadandon ka khayal rakha jata tha. lekin is bar ise khulakar swikar kiya gaya, yahi wajah hai ki is bar sawal bhi jyada uth rahe hain. waise sach to ye hai ki madhy pradesh ke ek akhabar ne 1996 ke sthaniy chunawon men apani jila yooniton ko pratyashiyon se kamaee ka lakshy diya tha. jisane nahin diya, unaka akhabar ne banyakat kiya aur isaki kimat un pratyashiyon ko chukani padi thi. lekin kamaee ka ye rasta chal nikala to ise midiya gharanon ne apanane men der nahin lagaee.
dhire-dhire ye rog poore desh men failane laga. panjab ke pichhale widhanasabha chunaw men kangres ke ek prachar prabhari ko is naee paripati se pahali bar sabaka pada. ab tak we janate the ki prachar ke liye rajy ya rashtriy mukhyalay se apane lakshy samooh wale akhabaron aur tiwi chainalon ko wijnyapan jari kiya jata hai. lekin us widhanasabha chunaw men pahali bar unhen pata chala ki midiya gharanon ne apani jila yooniton ko lakshy de rakhe the. ab marata patrakar kya na karata, lihaja do-do tin-tin sansthanon ke sthaniy patrakaron ne aapas men gut banakar khud ki marketing ki aur dabaw banakar unase wijnyapan ki mang ki. isake kuchh mahinon bad gujarat men widhanasabha chunaw huye. jab we gujarat ke chunaw prachar ke samandar men utare to wahan bhi patrakariy bhrashtachar ki is ganga se sabaka pada. rahi-sahi kasar lokasabha chunawon men poori ho gaee. lihaja ab to we man ke chalate hain ki har rajy men unhen aisa hi anubhaw hone wala hai.
jis tarah se midiya ke ek warg ki jayaj-najayaj mangon ke samane bade – bade dalon ke bade netaon tak ko jhukana pada, usase saf hai ki aaj midiya kitana takatawar ho gaya hai aur ek-yek wot ki jugat men jute netaon ke liye aise midiya ko nakarana bhi unake liye aasan nahin raha. aise men sabase bada sawal ye hai ki bhrashtachar par sawal uthane ki takat rakhane wale midiya sansthan is paripati ke bad kya sarakar aur netaon par usi aakramakata se sawal utha sakenge. isaka jawab pana filahal aasan nahin lagata. lekin isake sath ye bhi sach hai ki jo parti ya usake takatawar neta midiya ki is najayaj mang ke samane jhuk sakate hain, kya garanti hai ki we desh ke un aham masalon ko shiddat se hal kar payenge, jinake liye majabooti aur drdhata ki jaroorat hoti hai.
saf hai ki ye manyataon aur usoolon par sankat ka daur hai. lekin ye bhi sach hai ki sankat ke daur hi naye usoolon, majaboot paranparaon aur manawiy moolyon ki sthapana ki naee rah bhi sujhate hain. jab hindi patrakarita ke shalaka puroosh aur naujawan patrakaron ki toli isake khilaf aawaj uthane men nahin hichak rahi hai to naee ummid ka diya jalana galat nahin hoga.